Madaxweynaha Dowladda Puntland, Siciid Cabdullaahi Deni, ayaa magaalada Boosaaso guddoomiyay kulan looga hadlay xoojinta amniga badaha Puntland iyo kordhinta dakhliga gudaha.
Kulanka waxaa ka qeyb galay masuuliyiin ka tirsan Wasaaradaha Kalluumeysiga, Dekedaha iyo Maaliyadda, iyo saraakiil ka socotay Ciidanka Booliiska Puntland iyo Ciidanka Badda Puntland (PMPF).
Doodaha kulanka ayaa diiradda lagu saaray xoojinta ilaalinta biyaha Puntland, la-dagaallanka burcad-badeedda iyo ka hortagga khataraha amni ee ka dhaca xeebaha, iyo sidii loo horumarin lahaa nidaamka maamulka iyo ururinta cashuuraha.
Madaxweynaha iyo masuuliyiinta ayaa sidoo kale isla eegay qorshayaal lagu kordhinayo dakhliga gudaha, iyadoo la adkeynayo hannaanka cashuur-qaadista iyo maamulka ilaha dakhliga.
Kulanka ayaa qeyb ka ah dadaallada Puntland ay ku xoojinayso amniga badaha iyo horumarinta nidaamka maaliyadeed ee dowladda.