Madaxweynaha Dowladda Puntland ayaa si rasmi ah u furay Kalfadhiga 59-aad ee Golaha Wakiillada Puntland, isaga oo khudbaddiisa kaga hadlay xaaladda guud ee Puntland, waxqabadka xukuumaddiisa muddadii u dhexeysay labada kal-fadhi, amniga, nabadeynta, horumarinta kaabayaasha dhaqaalaha iyo xaaladda siyaasadeed ee Soomaaliya.
Madaxweynuhu wuxuu sheegay in muddadii u dhexeysay bilihii Juun iyo Oktoobar 2026 ay xukuumaddu qabatay hawlo la xiriira amniga, garsoorka, arrimaha bulshada, nabadeynta iyo horumarinta adeegyada dadweynaha.
Amniga iyo hawlgallada ciidamada
Madaxweynaha ayaa sheegay in la xoojiyey tababarrada ciidamada Daraawiishta iyo Booliiska, isla markaana la horumariyey xarumaha ciidamada iyo saldhigyada booliiska ee gobollada Puntland.
Wuxuu sidoo kale ka hadlay hawlgallada ka dhanka ah kooxaha argagixisada ee buuraha Calmiskaad iyo Calmadow, isaga oo sheegay in ciidamada Puntland ay sii wadaan dadaallada lagu xaqiijinayo amniga iyo xasilloonida deegaannadaas.
Dhanka kale, wuxuu xusay hawlgallada lagu xakameynayo hubka iyo gaadiidka milatari ee sharci-darrada ah, iyo dadaallada lagula dagaallamayo burcad-badeedda xeebaha Puntland.
Garsoorka iyo amniga badaha
Madaxweynuhu wuxuu sheegay in maxkamadaha Puntland ay qaadeen tallaabooyin la xiriira dacwadaha lagu soo oogay dad loo haysto falal argagixiso iyo xiriirro la sheegay inay la leeyihiin kooxaha hubeysan.
Wuxuu sidoo kale ka hadlay saameynta amni iyo dhaqaale ee xaaladaha ka jira marin-biyoodka gobolka, isaga oo sheegay in xukuumaddu diyaarisay qorshayaal lagu yareynayo saameynta dhaqaale ee colaadaha Bariga Dhexe.
Nabadeynta iyo horumarinta kaabayaasha dhaqaalaha
Madaxweynaha ayaa sheegay in safarro uu ku tegay gobollada Mudug, Bari iyo Raas-caseyr ay qayb ka ahaayeen dadaallada lagu xoojinayo nabadda, amniga iyo horumarka.
Wuxuu xusay dadaallada lagu xallinayo colaadaha ka soo cusboonaaday deegaannada Dhinowda iyo Towfiiq, iyo dadaallada nabadeynta ee gobolka Sanaag.
Dhanka horumarinta, wuxuu soo bandhigay waxqabadka xukuumadda ee waddooyinka, biyo-mareennada magaalooyinka, garoomada diyaaradaha iyo dekedaha Boosaaso iyo Garacad. Wuxuu sidoo kale xusay dadaallada lagu horumarinayo adeegyada caafimaadka iyo ka hortagga cudurrada faafa.
Khilaafka Dowladda Federaalka iyo Puntland
Qaybta siyaasadeed ee khudbaddiisa, Madaxweynaha Puntland wuxuu dhaliilay jihada siyaasadeed ee Dowladda Federaalka Soomaaliya, isaga oo ku eedeeyey Madaxweyne Xasan Sheekh Maxamuud inuu diiday in la qabto doorasho heshiis lagu yahay, isla markaana uu khatar geliyey geeddi-socodka dowlad-dhiska Soomaaliya.
Madaxweynuhu wuxuu sidoo kale walaac ka muujiyey isbeddellada siyaasadeed iyo khilaafaadka la xiriira dastuurka iyo hannaanka doorashooyinka dalka. Wuxuu ugu baaqay dhinacyada Soomaaliyeed iyo beesha caalamka in laga wada shaqeeyo badbaadinta dowladnimada iyo xasilloonida Soomaaliya.
Wuxuu intaas ku daray in xukuumaddiisu la yeelan doonto bulshada Puntland wada-tashi ku saabsan xaaladda siyaasadeed ee dalka iyo go’aannada masiiriga ah ee horyaalla.
Kalfadhiga 59-aad oo si rasmi ah loo furay.
Ugu dambayn, Madaxweynaha Puntland ayaa si rasmi ah ugu dhawaaqay furitaanka Kalfadhiga 59-aad ee Golaha Wakiillada Puntland, isaga oo xildhibaannada u rajeeyey inay guulo ka gaaraan arrimaha muhiimka ah ee horyaalla.